家長童學
學前階段 小學階段 中學階段

老人家偏心怎麼辦?

作者: 郭煥雯 最後更新: 16/04/2014

 

事件:偏心的老人家

錯誤的處理方法

婆婆:偉仔,係唔係你攪到個廁所濕晒?

偉仔:我係到洗手咋…

婆婆:洗手會洗到個廁所濕晒嘅咩?喺到玩水就真,你真係無用呀,成績又差,剩係識得玩,好心你就學吓個呀哥啦,年年都考頭五名,個個先生都讚佢叻呀!

偉仔:(面露不悅但不敢反駁)

媽媽:媽,你做乜咁話佢,咁佢做咗咁耐功課行開玩吓都好平常者,唔通你想佢變成書虫咩!

婆婆:(望著孩子)你叻啦,有人幫啦!(指著自己的女兒)你咁樣教仔,寵壞佢呀。

媽媽:媽,唔好話我話啦,其實你都好偏心。無論偉仔做乜你都睇唔過眼啦!如果係佢呀哥攪到個廁所濕晒,你就唔會發咁大脾氣啦!

婆婆:哦,的話吓個孫就話我偏心!唔通我依個做亞婆嘅連教吓個孫都無權…得啦,你以後唔好叫我睇佢呀,費事話親你個寶貝仔呀!

 

偉仔將洗手間弄濕,婆婆見到便大發脾氣,指責孩子,說孩子懶惰,比不上哥哥,媽媽覺得婆婆過份偏心,便批評老人家,埋怨婆婆偏心,令婆婆感到非常不滿。

 

反思反醒

  • 婆婆為了些甚麼事情去責罵孩子?
  • 媽媽見到婆婆指責孩子,有甚麼反應?
  • 婆婆經常怒罵孩子,對孩子有甚麼影響?
  • 遇到這種情況,你會怎樣處理?

孩子將洗手間弄濕,婆婆當然不高興,但看見女兒不但沒有懲罰孩子,反而怪責自己偏心,心中當然忿忿不平,到底孩子的媽媽應該怎樣才可以避免與婆婆有正面衝突?

 

老人家偏心怎麼辦?

有效的處理方法

婆婆:偉仔,係唔係你攪到個廁所濕晒?

偉仔:我係到洗手咋…

婆婆:洗手會洗到個廁所濕晒嘅咩?喺到玩水就真,你真係無用呀,成績又差,剩係識得玩,好心你就…

媽媽:(沒等婆婆說完,便說)偉仔,你第日洗手要小心啲啦,個地濕晒,大家跌親點算呢?!你要婆婆做多好多工夫呀,快啲同婆婆道歉啦!

偉仔:婆婆,對唔住,我以後唔敢啦!

婆婆:唔敢、唔敢,你次次都話唔敢!

媽媽:媽,唔好勞氣啦,偉仔,你入房去做埋啲功課啦。

(待偉仔入房後)

媽媽:(語氣溫和地說)媽,你以後唔好咁話佢啦,可能佢生得無呀哥咁聰明,做嘢又無咁快手,不過正所謂十隻手指有長短嘛,你點可以要求個個細路都一樣呢?我怕你再話吓佢唔及哥哥,佢就真係放棄自己,到時就唔知點算啦。

婆婆:唔話佢,唔通咁差都錫得落咩?

媽媽:其實佢都唔係好差者,你記唔記得上次你生日佢自己畫張生日卡俾你呀,總之,佢乖時你就讚吓佢,咁佢就會再乖啲呀啦!

婆婆:(一笑)係啦,係啦,教仔專家…

 

媽媽見到婆婆因為孫兒將洗手間弄濕而大興問罪之師,便立即叫孩子向婆婆道歉,而且讓孩子離開現場,然後才與婆婆討論孩子的情況,要求婆婆對孩子不要過份挑剔。

 

反思反醒

  • 媽媽見到孩子受指責,有甚麼反應?
  • 媽媽的做法有甚麼效用?
  • 婆婆是否會因為媽媽的做法而感到生氣?為甚麼?

 

事例分析

老人家偏心當然會令家長感到不安,但直斥其非只會令老人家產生反感,覺得子女不尊重自己。因此,媽媽首先讓孩子向婆婆道歉,安頓婆婆的情緒,而且更在與婆婆單獨在一起的時候,才討論對孩子的管教方法,避免有尷尬的場面最後在討論時,更提醒婆婆孫兒以往的良好表現,解釋偏心對孩子的影響,使婆婆不得不信服女兒。

祖家長經常會因為某種原因,例如:孩子特別聰明,可愛,善解人意等等,偏愛某位孩子,對其他的自然諸多挑剔或採取忽視的態度,面對這種情況,家長可以試用剛才提到的處理方法,去說服老人家。(參考〈老人家溺愛孩子怎麼辦?〉

另一方面家長也需要留意孩子的感受,免得孩子因為受到批評責罵而失去自信,覺得自己比不上別人,而自暴自棄。因此遇到這種情況,家長應多留意孩子,與孩子傾談,設法了解孩子的思想、感情,給予支持鼓勵,使他不會因為祖家長對自己的態度而產生自卑感。

 

家有一老,實是一寶

大多數之研究資料均指出,祖家長對孫子女是有正面的影響的:

  • 與祖父之母接觸令孫子女明白家庭的結構及功能,知道家庭背境、歷史等。另外給孩子一個與長輩相處的機會,在他們的成長過程中,得到更多人的關懷愛護,增添安全感。
  • 給孩子學習尊敬老人家的機會,孩子會由家長對以母的態度行為中建立其觀念、價值與行為準則,如令家長如何對待其家長,他也會用同樣的態度、方法去對待家長。
  • 家裡人口多,對孩子的社會發展較有幫助,因他需學習應付各個性格不同的家人,對他未來為人處世也作好準備。
  • 在工業化的社會之下,家長同時外出工作,祖家長便成為理想的保姆人選,也可為自己分擔家務的重責。

 

老人家偏心怎麼辦? 

資料來源:香港小童群益會

原文出版日期:2006年11月15日

 

作者簡介
郭煥雯
郭煥雯

曾任香港小童群益會九龍城家庭生活教育主任。

關鍵字詞: 管教 |說話技巧 |賞罰 |情緒管理