家長童學
小學階段 中學階段

嚴仁敏「談性」的經驗

作者: 姚潔玲 最後更新: 23/04/2014

被訪者簡介:

葉嚴仁敏女士現職香港城市大學人文及社會科學部高級講師,亦有豐富的前線工作經驗曾服務學校社會工作、輔導中心多年,於年多前開始為教育工作者及社工舉辦多個性教育工作坊,以裝備同工為青少年服務。

本文為筆者訪問葉太有關對提供性教育家長建議之摘錄,葉太就個人成長歷程、現今社會服務的需要、教學及前線的經驗,提出了不少讓家長反思的問題和建議。

 

(1) 個人成長

「尷尬?冇乜清晰印象…我以前讀女校,大家講咸濕笑話,好過癮…」

「我是在一個好開心嘅層面認識性的,屋企冇刻意去講,但月經來了,媽咪亦很正常及正確地給予指導。」

「但有些同學的成長過程奇怪,月經來了,沒人向她解釋,家人反應古怪,甚至自己還以為要入急症室!」

 

(2) 社會現況

「…幾年前有一個以大專生性認知程度為主題的研究,平均答中問題比例只有四成多…」

「中學只教普通生理知識,其實非常不足,大專生亦未能正確認識性,家長可多做功夫了!」

 

(3) 教學經驗

「…有位社工系學生被問及什麼叫『射精』,他已不安到要離開課室!…但有些卻笑到收唔番,笑到張椅反轉咗!」

「其實上 Lab 談〈愛、性、及婚姻〉內容並不太深入,但有位同學是非常虔誠的基督徒,佢在遊戲中被問到『什麼是射精?』已唔舒服到要離開課室,沒有繼續上堂 – 但他正受正式訓練,將成為一個要和 Client 接觸的社工!自己仍未能突破心理障礙,幸好此類學生並不太多…大多以講笑形式,開心到不得了,講笑到收唔番…但可能佢哋實際上覺尷尬,要用幽默來解決,以講笑形式較易接受。」

 

(4) 前線經驗

「…有一個年青丈夫,婚後不願和太太發生性行為…原來他以為射精會傷身…在輔導中心工作時見到一個實習學生,聽電話時神情有異,原來她接到咸濕電話,好驚!」

「我做學校社工時已有很多有關婚前懷孕的個案,做輔導中心時,亦有年青夫婦就性的問題主動求助,有個年青丈夫,婚後不願和太太發生性行為,原來他媽媽自小向他灌輸『射精會傷身』這個概念,亦『不應有夢遺』,所以他長大後,試過有夢遺後感到非常內咎,要幫他,就要改變他的內在價值觀…」

「我訓練熱線義工時,係要訓練到佢哋能應付到咸濕電話,買咗好多成人書迫佢哋睇,令到佢哋唔驚…」

 

(5) 給家長的建議

「…家長也常有一壞習慣:「冇耐性」…我強調要由了解開始…「性」是一個好複雜的題目,在教人之前,先要好了解自己點睇…」

「態度是非常重要的,究竟我哋係咪明白對方正講緊啲乜?家長也常有一個壞習價:『冇耐性』,我哋若冇留心聽,自己的身體已告訴孩子,還有若遇上不明白的地方,自己又如何處理?孩子講「白色太陽槍」,自己係咪張開口得個窿?有冇未聽清楚人哋講乜就咗佢?有冇對自己的感覺保持敏感?我始終強調要由了解開始。」

「『性』係一個好複雜的題目,一提到性,有人即會聯想到咸濕同唔正確嘅嘢…家長自己又點睇性呢?係禁忌?褻瑣?我哋又對性認識有多少,知識又從邊度嚟?…去教人之前要好了解自己點睇性。」

 

(6) 我們的角色

「…一個很基本的問題:家長究竟係『實用派』還是『道德派』?…你罰佢,佢走咗啫,問題都冇解決。」

「…細佬仔睇咸書,你呢度唔比我睇我去第二度睇,你管得幾多?…我個人不會用罰的方法,我會用好奇的態度,捉住他的反應,再向他反映他的情感,從唔同嘅角度令青少年講出他的需要。

再幫佢培養一個正確的態度,當然『正確』係乜仍有待界定,你想佢明白內容邊啲啱邊啲錯?抑或幾時可以試幾時又唔得?幫佢分析,比佢自己選擇…抑或去罰佢?去罰佢佢走咗啫,問題都冇解決,所以自己要好好反省想達到乜嘢目標,我唸青年人唔難接觸,最緊要你令佢知道你想了解佢。」

 

(7) 最後一支強心針

「…我唔覺得『性』特別難處理,都係生活上嘅問題啫…如第一次覺得好困難,咪一路做一路問其他家長、社工囉…『驚』冇用,最緊要係面對問題…其實孩子喺個過程度佢都會幫你…」

「…坊間其實有好多資源,知識、技巧可以學得到…我唔覺得『性』特別難處理,其實都係生活上嘅問題啫,問題就是我們當它是一個怎樣的問題,將佢逐步逐步解決…」

「…能力係緊要,但如果對自己冇信心,就好難去做,要俾信心自己,自己係能夠處理嘅,如第一次覺得好難,咪一路做一路問其他家長、社工囉!慢慢累積知識,將佢哋寫低,有經驗就有能力去處理…好似嗰個好驚「射精」嘅青少年孩子,其實果時我都唔識,又未結婚,但驚係冇用嘅。最緊要係面對,其實個青少年孩子喺過程中都會幫你。」

 

嚴仁敏「談性」的經驗 

資料來源
《群思第七卷 第一期》
香港小童群益會

原文出版日期:2006年6月6日

編者註:因應家長讀者的需要,本文曾由編者就對象上為作出修訂

 

作者簡介
姚潔玲
姚潔玲

註冊社工,香港小童群益會中心主任。

關鍵字詞: 性教育 |性知識